ЭКГ-д суралцах төв - Стандарт 12 холболттой ЭКГ

www.imedinfo.org сайтын хамт олон Ютагийн Их Сургуулийн Анагаах Ухааны Сургуулийн профессор Frank G. Yanowitz, MD-ийн "ЭКГ-д суралцах төв" хэмээх бүтээлийг орчуулан хүргэж байна. Энэхүү бүтээл нь зүрхний цахилгаан бичлэгийн талаарх суурь ойлголтууд, зүрхний цахилгаан бичлэгийг хэрхэн зөв, дэс дараалалтай унших арга зүй, зүрхний эмгэгүүдийн үед зүрхний цахилгаан бичлэгт гарах өөрчлөлт, тэдгээрийг хэрхэн унших талаар дэлгэрэнгүй бичсэн бүтээл юм.

I бүлэг: Стандарт 12 холболттой ЭКГ

Стандарт 12 холболттой электрокардиограм нь биеийн гадаргуу дээрхи электродуудаас зүрхний цахилгаан идэвхижлийн талаарх мэдээллийг бичдэг. Энэ бүлэгт ЭКГ-ийн үндсэн бүрдэл болон ЭКГ бичлэг хийхэд ашиглагддаг холболтын системийн талаар бичсэн болно.

Энэ бүлгийн хүрээнд судлах сэдвүүд

1. ЭКГ шүднүүд ба интервалууд 

2. 12 холболттой ЭКГ-ийн орон зайн чиглэлүүд     

 

Энэхүү зурагт ЭКГ-ийн шүднүүд болон интервалууд түүнчлэн ЭКГ цаасан дээрхи стандарт хугацаа болон хүчдэлийг харууллаа.

1. ЭКГ шүднүүд ба интервалууд

Тэд юуг илтгэдэг вэ?

• Р шүд: баруун болон зүүн тосгуурын дараалсан идэвхижил (деполяризаци)
• QRS бүрдэл: баруун болон зүүн ховдолын деполяризаци (хэвийн үед ховдолууд зэрэг идэвхиждэг)
• ST-T шүд: ховдолын реполяризаци
• U шүд: энэхүү шүдний үүсэл гарал тодорхой бус байгаа боловч ховдолууд дахь деполяризацийн дараах байдлыг илтгэдэг байж болох юм гэж үздэг
• PR интервал: тосгуурын деполяризацийн (Р шүд) эхлэлээс ховдолын деполяризацийн (QRS бүрдэл) эхлэлийн хугацааны интервал
• QRS-ийн хугацаа: ховдолын булчингийн деполяризацийн хугацаа
• QT интервал: ховдолын деполяризаци болон реполяризацийн хугацаа
• RR интервал: зүрхний ховдолын мөчлөгийн хугацаа (ховдолын агшилтын тоог илтгэгч)
• PP интервал: тосгуурын мөчлөгийн хугацаа (тосгуурын агшилтын тоог илтгэгч)

2. 12 холболттой ЭКГ-ийн чиглэл

12 холболттой ЭКГ нь 3 ортогонал чиглэлд зүрхний цахилгаан идэвхижлийн талаарх spatial мэдээллийг өгдөг гэдгийг санах нь чухал юм.

• Баруун ↔ Зүүн
• Дээд ↔ Доод
• Урд ↔ Ар

12 холболт тус бүр нь доор дурьдсан шиг орон зайд тодорхой чиглэлийг зааж байдаг. (RA-баруун гар, LA-зүүн гар, LF-зүүн хөл)

• Хоёр туйлт мөчдийн холболтууд (фронтал хавтгайд дүрсэлнэ)
  • I холболт: RA (-)-аас LA (+) руу (Баруунаас зүүн чиглэлд буюу хажуугийн)
  • II холболт: RA (-)-аас LF (+) руу (Дээрээс доош чиглэлд)
  • III холболт: LA (-)-аас LF (+) руу (Дээрээс доош чиглэлд)

• Хүч нэмэгдүүлсэн нэг туйлт мөчдийн холболтууд (фронтал хавтгайд дүрсэлнэ)
  • aVR холболт: RA (+)-аас [LA болон LF] (-) руу (Барууны)
  • aVL холболт: LA (+)-аас [RA болон LF](-) руу (Зүүний)
  • aVF холболт: LF (+)-аас [RA болон LA](-) руу (Доод)

• Нэг туйлт (+) цээжний холболтууд (горзинтал хавтгайд дүрсэлнэ)
  • V1, V2, V3 холболтууд: (Ардаас урагшаа чиглэлд)
  • V4, V5, V6 холболтууд: (Баруунаас зүүн чиглэлд буюу хажуугийн)

Анхаар: Эйнтховений гурвалжин: фронтал хавтгайн 6 холболт тус бүр сөрөг болон эерэг чиглэлтэй байна (+ болон – тэмдэгээр тэмдэглэсэн). Энд I холболт нь чиглэлийн хувьд баруун↔зүүн байдгийг (aVR болон aVL холболт руу бага зэрэг тархсан) мэддэг байх нь чухал. Мөн aVF холболт нь чиглэлийн хувьд дээрээс↔доош чиглэлтэй (II болон III холболтууд руу бага зэрэг тархсан) байдаг.   

Дээрхи зурагт фронтал хавтгайн холболтуудыг дүрсэллээ. 

 

4 болон 5-р хавирга завсар дахь цээжний электродуудын байрлалыг харуулав

V1: Баруун талд 4-р хавирганы завсарт

V2: Зүүн талд 4-р хавирганы завсарт

V3: V2 болон V4-ийн дунд

V4: Эгэмийн дунд шугамаар 5-р хавирганы завсарт

V5: Суганы урд шугамаар V4 холболттой харалдаа

V6: Суганы дунд шугамаар V5 холболттой харалдаа       Эх сурвалж:  I. The Standard 12 Lead ECG